За апошнія паўтары гады з Ліцэя БДУ былі звольненыя 12 выкладчыкаў. Аб гэтым у інтэрв'ю выданню «Наша Ніва» распавёў былы дырэктар навучальнай установы Ігар Варакса. Ён таксама ўпершыню агучыў прычыну свайго сыходу з ліцэя ў ліпені 2021 года.
— Я працаваў дырэктарам на працягу двух гадоў, але разумеў, што сітуацыя ў Беларусі ўвогуле, і ў сістэме адукацыі ў прыватнасці, разгортваецца не ў тым кірунку, у якім бы мне хацелася бачыць.
Перспектыў захаваць лад жыцця, да якога многія прызвычаіліся за гады «беларускай адлігі» — 2015−2019, — не было ніякіх.
Ліцэй не змог бы надалей існаваць на выспе, адрэзаны ад усёй астатняй сістэмы адукацыі. У сваю чаргу мне не хацелася б бачыць на ўласныя вочы заняпад той справы, у якую ўкладаў душу. А яшчэ не хацелася нішчыць сваімі ж рукамі тое, што ствараў падчас папярэдняй працы ў Ліцэі. Таму трэба было сыходзіць, — гаворыць Варакса.
Паводле яго слоў, улады не чапалі ліцэй вельмі доўга.
— У 2020-м і 2021-м ніякіх істотных зменаў не адбывалася. Напэўна, уладам было не да нас, бо праблемы ў іх тады былі іншыя. Пазней яны вырашыліся, і рукі сталі даходзіць да ўстаноў адукацыі.
Разам з тым, адзначае, прадчуваў, што ўсё ідзе да таго, што «некаторыя сучасныя новаўвядзенні ў выхаваўчай працы ва ўстановах адукацыі», якія ён не падтрымлівае, хутка пачнуць уводзіць і ў ліцэі.
Ігар Варакса адзначае: па яго падліках, з таго часу, калі ён сышоў, з ліцэя былі звольненыя альбо сышлі самастойна 12 супрацоўнікаў.
Варакса гаворыць, што катэгарычна не згодны з тым, што ў Беларусі лепшая адукацыя. І адзначае, што настаўнік павінен да вучняў ставіцца як да калег, а не зверху ўніз. Менавіта ў гэтым была ўнікальнасць ліцэя.
— Я вельмі доўга працаваў у Ліцэі БДУ, таму ў мяне прафесійная дэфармацыя адбылася за доўгі перыяд працы. Я б пераробліваў усё па прыкладзе Ліцэя — творчасць і вольнасць, — гаворыць ён.
Нагадаем, кандыдат фізіка-матэматычных навук Ігар Варакса працаваў у Ліцэі БДУ 20 гадоў. З 2019-га па 2021-ы ён быў там дырэктарам. У жніўні 2021 года стала вядома, што у ліцэі новы дырэктар, а Ігар Варакса сышоў месяцам раней па згодзе бакоў. Як распавёў Варакса «Нашай Ніве», пасля звальнення ён з сям’ёй з’ехаў з Беларусі ва Украіну. Пасля пачатку вайны яны пераехалі ў Літву.
